İtaliyanın Siciliya bölgəsindəki Palermo şəhərində keçirilən əməliyyat nəticəsində 130 mafiya üzvü həbs edilib. Koza Nostra mafiya qrupuna qarşı keçirilən əməliyyatda mafiya üzvlərinin narkotik ticarəti başda olmaqla bir çox cinayətlərdə mühakimə olunacağı bildirilib. Əməliyyat göstərdi ki, mafiya son illərdə geriləmələrə baxmayaraq, cinayətin mühüm şübhəlisi olmaqda davam edir.

Palermo və ətraf bölgələrdə yerləşən Koza Nostra mafiya qruplaşması, 1980-ci və 1990-cı illərdə İtaliyanı terror etdi. Lakin o vaxtdan bəri Avropanın ən güclü dəstəsi olaraq Kalabriya qruplaşması “Ndrangheta”nın kölgəsində qaldı.

Karabiniyeri polisinin verdiyi açıqlamada şübhəlilərin müxtəlif cinayətlərdə, o cümlədən narkotik vasitələrin qanunsuz dövriyyəsi, qətl, adam öldürməyə cəhd, qəsb, qeyri-qanuni onlayn qumar oyunları və qeyri-qanuni odlu silah saxlamaqda ittiham edildiyini bildirib. Digər cinayətlərə görə artıq həbsdə olan 33 şübhəli barəsində əlavə həbs qərarı çıxarılıb.

Polisin dediyinə görə, araşdırmalar nəticəsində Palermodakı mafiya ailələrinin şəhər və əyalət daxilində fəaliyyətlərini koordinasiya etdikləri, xüsusən də narkotik ticarəti ilə bağlı olduğu ortaya çıxıb.

Məlumata görə, şəhərin mafioz ailələri Karleone qruplaşmasının illərlə hökmranlığından sonra yenidən səlahiyyət əldə ediblər.

Köhnə üzvdən gənc üzvə “mafiya dərsi”

Müstəntiqlər deyirlər ki, bugünkü mafiya liderləri öz bizneslərini həyata keçirmək üçün müasir texnologiyadan istifadə edirlər. Həbsdəki liderlərin əmrlərini yerinə yetirməyə davam etməsini təmin etmək üçün həbsxanalara şifrəli mobil telefonlar gətirilir. Karabiniyeri təhlükəsizlik qüvvələri “Koza Nostra”nın gəncləri cəlb etməyə davam etdiyini deyib. Onların sözlərinə görə, işə yeni qəbul edilənə yaşlı bir mafiya üzvü tərəfindən “mafiya dərsləri” verilir.

Polisin bəyanatında deyilir ki, gələcək mentor gənc işə götürülən şəxsə “xüsusi göstərişlər verib, onu qəsblərə məruz qalacaq şəxslərlə davranış modelləşdirməyə dəvət edib və ona mafiya liderləri ilə necə davranmağı məsləhət görüb”.

İtaliyanın baş naziri Qiorgiya Meloni həbsləri “Koza Nostra”ya çox ağır zərbə” kimi qiymətləndirib və “mafiyaya qarşı mübarizənin dayanmadığı və dayanmayacağı” barədə açıq mesaj verib.