Güney azərbaycanlı fəallar İran hökumətinin son vaxtlar yenidən başlatdığı “salam komandan” adlı kütləvi ideoloji təbliğatına qarşı aksiya keçiriblər. Fəallar Təbrizin müxtəlif yerlərində Azərbaycan bayrağı rənglərində “Salam Azərbaycan” məzmunlu yazılı vərəqələr və plakatlar yapışdıraraq Tehran hökumətinin təbliğatına cavab veriblər.

Qeyd edək ki, milli-mədəni fəallar bundan öncə bildiriş yayaraq mayın 31-dən Ərdəbil və Təbrizdə keçirilməsi nəzərdə tutulan tədbirlərə cavab olaraq “Salam Azərbaycan”, “Salam vətən” və “Azadlıq, ədalət, milli hökumət” şüarlarının səsləndirilməsi və yayılması tövsiyə etmişdilər.

Təbriz və Ərdəbildə şəhərlərində keçirilən hökumətin ideoloji təbliğat tədbiri olduqca sönük və az sayda şəxsin iştirakı ilə baş tutub.

İranda bahalıq və ərzaq qıtlığına qarşı başlayan etirazlarla eyni vaxtda İnqilab Keşikçiləri Korpusu, Təhsil və Mədəniyyət Nazirliklərinin dəstəyi ilə onlarla şəhərdə “salam komandan” adlı ideoloji təbliğat tədbirləri keçirilməyə başlanılıb.

“Mehdi”nin gəlişini, onun gəlişi ilə bütün problemlərin həll olunacağını və şiəliyin yayılacağını aşılayan təbliğatda əsasən azyaşlı uşaqlar və yeniyetmələrdən istifadə olunur.