Təbriz, Üskü və Tufarqan (Azərşəhr) şəhərlərinin İran parlamentindəki nümayəndəsi Məsud Pezeşkiyan mediaya verdiyi açıqlamada Azərbaycan Mis Şirkətinin yaradılmasının vacibliyini bildirib.

“Azərbaycanlılar ayrı-seçkilik və ədalətsizliyi tam çılpaqlığı ilə hiss ediblər. Necə olur ki, İsfahanda sürət qatarının tikiləcəyini düşündükləri halda, azərbaycanlılar 170 kilometrlik dəmir yolunun bitməsini 20 il gözləməli olurlar”, – deyə Pezeşkiyan qeyd edib.

O, Kirman əyalətinin Azərbaycan misi və sərvətləri hesabına günü-gündən inkişaf etdiyini, Vərziğanda isə adi bir idman zalının inşa edilmədiyini, bunun qəbuledilməz olduğunu deyib.

“Görünür mübahisəli məsələlərdə kirmanlıların çənəsi daha yaxşı işlədiyi üçün illərdir Azərbaycan Mis Şirkətinin yaradılmasına çalışmağımıza baxmayaraq bunun qarşısını ala biliblər”, – deyən Məsud Pezeşkiyan dövlət və parlamentin kirmanlıları dəstəklədiyini söyləyib.