Hollandiyada 2025-ci ilin ilk altı ayı ərzində avtomobil oğurluqları nəzərəçarpacaq dərəcədə artıb. Avtomobil Cinayətləri Sığorta Bürosu (VbV) tərəfindən açıqlanan yeni məlumatlara görə, cinayətkarlar getdikcə daha mürəkkəb üsullardan istifadə edirlər. Xüsusilə hibrid avtomobillər hədəf alınır və oğurlanan avtomobillərin çoxu Afrika ölkələrinə göndərilir.

Vaxt.az xəbər verir ki, bu ilin ilk altı ayı ərzində ümumilikdə 3,645 minik avtomobili oğurlanıb. Bu, ötən ilin eyni dövrü ilə müqayisədə 20 faizlik artım deməkdir. Ən çox oğurluq Eyndhovendə baş verib. Onu Amsterdam və Haaqa izləyir. Ən çox oğurlanan minik avtomobili modeli “Toyota RAV4” (232 hadisə) olub. “Kia Sportage” modelində isə diqqətçəkən bir artım müşahidə olunub; bu modeldə oğurluq sayı dörd dəfə artaraq 19-dan 82-yə yüksəlib.

***

VbV-nin açıqlamasına görə, oğrular fara (koplamp) bağlantısı vasitəsilə mühərriki işə sala bilən xüsusi cihazlardan istifadə edirlər. Bu üsul avtomobillərin asanlıqla oğurlanmasını təmin edir. Oğurlanan avtomobillərin əksəriyyəti konteynerlərə yerləşdirilərək, əsasən Qana olmaqla Afrika ölkələrinə göndərilir. Bu konteynerlərin adətən yoxlanılmadığı və Afrikada hibrid avtomobillərə olan yüksək tələbatın bu tendensiyanı gücləndirdiyi bildirilir.

Sığorta zərərləri artır

Bahalı avtomobillərə yönəlik oğurluq cəhdləri də artarkən, sığorta şirkətlərinin zərərləri böyüyür. Oğurlanmış avtomobil başına orta zərər 30 faiz artaraq 17,500 avroya çatıb. Ümumi sığorta zərəri isə 60 faiz artımla 64 milyon avroya yüksəlib.

VbV, avtomobil istehsalçıları ilə əməkdaşlıq edərək telematik sistemlərdən istifadə etməklə oğurlanmış avtomobillərin yerini müəyyənləşdirir. Bu yolla təxminən 200 avtomobilin hələ də Qanada aktiv şəkildə istifadə olunduğu aşkarlanıb. Lakin bu avtomobillərin geri qaytarılması olduqca çətin və bahalıdır. Bütün bu artımlara baxmayaraq, 2025-ci ilin ilk yarısında 7,000-dən çox oğurlanmış avtomobil tapılıb. Bu avtomobillərin əksəriyyəti Hollandiyada, bir qismi isə Almaniya, Belçika, Bolqarıstan və Polşa kimi ölkələrdə aşkar edilib. 2025-ci ildə ən çox minik avtomobili oğurluğunun baş verdiyi ilk 10 şəhər:

Eyndhoven – 519 avtomobil 

Amsterdam – 243 avtomobil 

Haaqa – 225 avtomobil 

Rotterdam – 160 avtomobil 

Utrext – 112 avtomobil 

Almere – 70 avtomobil 

Nijmegen – 63 avtomobil 

Tilburq – 52 avtomobil 

Heerlen – 51 avtomobil 

Maastrixt – 50 avtomobil

2025-ci ildə ən çox ticari avtomobil oğurluğunun yaşandığı ilk 10 şəhər:Eyndhoven – 162 avtomobil 

Rotterdam – 48 avtomobil 

Haaqa – 39 avtomobil 

Amsterdam – 37 avtomobil 

Utrext – 30 avtomobil 

Heerlen – 17 avtomobil 

Dordrext – 11 avtomobil 

Geldrop – 11 avtomobil 

S-Hertoqenbos – 11 avtomobil 

Reysveyk – 10 avtomobil