Yay aylarında çox adam narahat edən arı və ya eşşək arısını görən kimi öldürməyə çalışır. Lakin Almaniyada vəziyyət o qədər sadə deyil. Eşşək arısı növləri ümumilikdə qorunur və izinsiz öldürülməsi qadağandır. Xüsusilə “Kreiselwespe” kimi nadir növlər xüsusi qorunma altındadır. Bu növləri icazəsiz öldürmək qanuna görə 50 min avroya qədər cəza tələb edə bilər.

Almaniyanın Federal Təbiəti Qoruma Qanununa görə, vəhşi heyvanlar heç bir “məqbul səbəb” olmadan öldürülə və ya yaşayış sahələri məhv edilə bilməz. İstisnalar yalnız açıq təhlükə hallarında keçərlidir. Məsələn, allergiyası olan şəxsin həyatını təhdid edən və ya uşaqlar və ev heyvanları üçün ciddi risk yaradacaq hallarda eşşək arıları öldürülə və ya yuvaları götürülə bilər. Lakin bu səbəblər dəqiq sübut edilməlidir.

Yüksək cəzalar kağız üzərində qalır

Gerçəkdə vəziyyət necədir?

50 min avroya qədər cəzalardan danışılsa da, bu qanunun müəyyən etdiyi maksimum həddir. Praktikada vəziyyət fərqlidir. Rəsmi orqanların tətbiqinə baxanda tək bir eşşək arısının öldürülməsi çox vaxt yalnız xəbərdarlıqla nəticələnir. Hətta Şimali Reyn-Vestfaliyada 2013-2018-ci illər arasında verilən ən ciddi cəza yalnız 45 avroluq cərimə olub. Yəni kağız üzərindəki rəqəmlər ilə praktikada tətbiq olunan cəzalar arasında böyük fərq var.

Zərər verməkdənsə qabaqlayıcı tədbir tövsiyə olunur

Nəticədə, eşşək arılarını öldürmək qadağandır və bəzi hallarda çox ciddi cərimələrə səbəb ola bilər. Amma ən yüksək cəza yalnız istisna hallarda tətbiq olunur. Mütəxəssislər böcəkləri öldürməkdənsə, təbii üsullarla uzaqlaşdırmağı, pərdə və ya örtükdən istifadə etməyi, ciddi təhlükə varsa isə peşəkar yardıma müraciət etməyi məsləhət görürlər.