Hindistanın qərbində yerləşən Mumbay şəhərində ictimai yerlərdə göyərçinlərə yem vermək qadağan edilib.

Mumbay bələdiyyəsi tərəfindən tətbiq olunan bu qadağa, yerli hakimiyyət orqanları, ictimai sağlamlıq müdafiəçiləri və quşsevərlər arasında böyük bir gərginliyə səbəb olub.

Ayın əvvəlində, onlarca illik fəaliyyət göstərən bir “kabutarkhana”nın (göyərçin bəsləmə məkanı) bağlanmasına etiraz edən yüzlərlə nəfər polis ilə iki dəfə qarşıdurmaya girdi.

Etirazçılar plakatları cırıb və müddətsiz aclıq aksiyası ilə hədələyib. Etirazlarda təxminən 15 nəfər saxlanılıb. Qadağanın əsas səbəbi göyərçin tullantılarının yaratdığı sağlamlıq riskləri idi.

Sağlamlıq narahatlıqları və artan göyərçin populyasiyası

Tədqiqatlar göstərir ki, göyərçin nəcisləri ağciyər iltihabı, göbələk infeksiyaları və davamlı tənəffüs problemlərinə səbəb ola bilər.

Hindistanda göyərçin sayı 2000-ci ildən bəri 150%-dən çox artıb və bu da ciddi ekoloji və sağlamlıq problemləri yaradıb.

2023-cü ilin “State of India’s Birds” hesabatına görə, hər bir göyərçin ildə 15 kiloqrama qədər ifrazat edir.

Son illərdə Dehli şəhərində bir uşağın uzun müddət göyərçin ifrazına məruz qalması nəticəsində həyatını itirməsi, mütəxəssislərin xəbərdarlıqlarını daha da önə çıxardı.

Mədəni və dini aspektlər

Göyərçinlər Hindistanın mədəni həyatında mühüm yer tutur. Filmlərdən gündəlik həyata qədər bir çox sahədə göyərçin bəsləmə səhnələri tez-tez görünür. Bəzi “kabutarkhana”lar tarixi və xeyriyyə məqsədli qurumlar kimi tanınır.

Xüsusilə Cayn icması üçün göyərçinlərə yem vermək dini vəzifə sayılır. Bu səbəbdən Mumbaydakı qadağa dini dairələrin sərt reaksiyasına səbəb oldu.

Həll yolları axtarışları

Mumbay Ali Məhkəməsi qadağaya qarşı açılan iddianı rədd edərək, ictimai sağlamlığın “prioritet” olduğunu vurğulayıb. Lakin eyni zamanda bir mütəxəssislər paneli yaradılaraq alternativ təkliflərin hazırlanmasını istəyib.

Heyvan hüquqları təşkilatı “PETA India”, səhər və axşam müəyyən edilmiş saatlarda məhdud bəsləmə aparılmasını tövsiyə edir. Bu yolla həm gigiyena təmin edilə bilər, həm də insanların quşlarla olan əlaqəsi qorunmuş olar.