Argentina futbolunun dünyaya bəxş etdiyi nadir istedadlardan biri sayılan Dieqo Armando Maradonanın cəsədinin yarılma hesabatı açıqlanıb. Hesabatı araşdıran məhkəmə-tibb eksperti Maradonanın 12 saat əziyyət çəkdiyini və bu müddət ərzində heç bir müdaxilə edilmədiyini iddia edib.

Hesabat əvvəllər dəfələrlə gündəmə gələn qətl iddialarını gücləndirir.

Sənədləri araşdıran ekspert iddia edib ki, futbol əfsanəsinin ürəyi əziyyət çəkdiyi 12 saat ərzində normaldan iki dəfə çox böyüyüb.

Artıq ürək çatışmazlığından onun digər orqanlarına 4,5 litr mayenin yığıldığı deyilirdi.

Argentinadan “Clarin” qəzetinə danışan Karlos Maurisio Casinelli “qətl”lə bağlı fikirlərini məhkəməyə çatdırdığını vurğulayıb: “Onun ürəyi tamamilə piy və qan laxtaları ilə örtülmüşdü ki, bu da onun ağrıdığının əlamətidir. Söhbət qısa zamanda aşkarlana biləcək bir şeydən gedir. İstənilən həkim problemi görə bilərdi. Onun ölümü ilə bağlı şübhəli məqam ola bilər”.

Aylar əvvəl yenidən açılan iş çərçivəsində Maradonanın köməkçiləri və tibb işçiləri də daxil olmaqla bir qrup şəxs mühakimə olunur.