İyunun 21-dən bəri Yaponiyanın cənubunda 1600-ə yaxın (daha dəqiq 1582) zəlzələ baş verib. Adalarda yaşayan onlarla insan bölgəni tərk edib.

Adaların yerləşdiyi Kaqoşima Bələdiyyə başçısı Qeniçiro Kubo, gecə saatlarında zəlzələdən ən çox təsirlənən Akuseski adasında 5,1 bal gücündə zəlzələnin baş verdiyini və adada ciddi fiziki ziyanın olmadığını bildirib.

Bununla belə, iyunun 21-dən etibarən demək olar ki, fasiləsiz davam edən zəlzələlər ada sakinlərini stressə salıb. Bir çox insan bu səbəbdən yata bilmədiklərini deyib.

Kubo mətbuat konfransında Akuseskidə yaşayan 89 nəfərdən 44-nün Kaqoşima bölgə mərkəzinə gətirildiyini açıqlayıb. On beş nəfər yaxınlıqdakı başqa bir adaya sığınıb.

Yeddisi məskunlaşmış və beşində isə insan yaşamayan adalardan ibarət olan bölgə Kaqoşimadan bərə ilə təxminən 11 saatlıq məsafədədir.

Mütəxəssislərin fikrincə, bu bölgədə bu qədər təkanların səbəbi sualtı vulkan və maqma axınları ola bilər.

Kubo mətbuata açıqlamasında, "Gələcəkdə nə baş verə biləcəyini təxmin edə bilmərik. Bunun nə vaxt bitəcəyini də bilmirik”, – deyib.

Yaponiya Meteorologiya Agentliyinin məlumatına görə, regionda sonuncu dəfə belə seysmik aktivlik 2023-cü ilin sentyabrında baş verib. Həmin vaxt bölgədə 346 təkan qeydə alınmışdı.

Təxminən 125 milyon insanın yaşadığı bu bölgədə hər il təxminən 1500 təkan olur ki, bu da dünyadakı zəlzələlərin təxminən 18 faizini təşkil edir.