Almaniyada yay mövsümü şiddətli yağışlar, fırtınalar və sərin hava dalğaları ilə başa çatır. Avqustun son günləri ilə birlikdə meteoroloji baxımdan payıza keçid nəzərə çarpır. Eks-qartropik fırtına “Erin” zəifləsə də, Almaniyaya təsirini davam etdirir. Bu sistemlə bərabər, ölkənin müxtəlif yerlərində leysan yağışlar, ildırım və uzun sürən yağıntılar gözlənilir.

Mütəxəssislər bildirir ki, rütubətli yay havası ilə sərin dəniz havasının toqquşduğu zonalarda güclü yağış ehtimalı yüksəkdir. Qısa müddətdə hər kvadratmetrə 15–40 litr yağıntı düşə bilər ki, bu da lokal daşqın riskini artırır. Havanın qərb bölgələrində dolu və fırtına ilə müşayiət olunan leysanlar müşahidə olunacaq. Şərqdə isə 30 dərəcəyə çatan isti hava hakimdir. Alp dağlarının ətəklərində temperatur 18 dərəcədən yuxarı qalxmır.

Alp bölgəsində təhlükə siqnalı

Ən ağır vəziyyət Alp bölgəsində müşahidə olunur. Şimali İtaliyada yaranan yeni aşağı təzyiq sistemi İsveçrənin Tiçino bölgəsindən İtaliyanın Cənubi Tirol əyalətinə, oradan da Avstriyanın Karintiya bölgəsinə qədər geniş ərazidə yüksək təhlükə xəbərdarlıqlarına səbəb olub. Bu günə qədər yağıntıların hər kvadratmetrə 200 litrə qədər çatacağı bildirilir. Böyük dolu dənələri, fırtına və qasırğa gücündə küləklər müşahidə oluna bilər. Dağlıq ərazilərdə yürüş və kamp kimi açıq hava fəaliyyətləri risklidir. Hakimiyyət sakinlərə açıq məkanlardan uzaq durmağı tövsiyə edib.

Həftə sonuna doğru hava bir qədər sabitləşəcək. Sabah güclü fırtına təhlükəsi aradan qalxacaq, amma hava dəyişkən və küləkli olacaq. Temperatur 18–25 dərəcə arasında dəyişəcək.

Avqustun 31-dən etibarən isə tropik sistem “Eks-Ferdinand” Britaniya sahillərində “Eks-Erin”in yerini alaraq Almaniyaya yaxınlaşacaq. Bazar ertəsi ildırımlı leysanlarla müşayiət olunacaq. Temperatur 18–28 dərəcə arasında tərəddüd edəcək. Çərşənbə axşamı isə əsasən ölkənin cənub bölgələrində günəşli hava ilə qısamüddətli yağışlar bir-birini əvəz edəcək. Havanın 18–25 dərəcə aralığında qalması gözlənilir. Yay havası tamamilə payıza təhvil verir.

2025-in yayı necə keçdi?

Almaniyada iyun-avqust aylarında hava güney-qərbi Avropadan gələn isti dalğalar ilə Atlantikdən daxil olan sərin sistemlər arasında qaldı. İyulun əvvəlində temperatur 39,3 dərəcəyə yüksəlsə də, ümumilikdə serin, dəyişkən və yağışlı yay qeydə alındı. Bəzi bölgələrdə yağıntı az oldu, ağacların yarpaqları payızdan əvvəl quruyaraq töküldü. Digər tərəfdən, ölkənin şimalı və Alp bölgələri çox yağış aldı.

Güney Avropada davamlı isti dalğaların əksinə olaraq, Almaniya bu yay əsasən sərin keçdi. 2025-ci il, qısa müddətli istilər istisna olmaqla, yağışlı və qeyri-sabit yay kimi yadda qalacaq.