Hindistanda özünü dünyaca məşhur britaniyalı kardioloq kimi təqdim edən Narendra Vikramaditya Yadav açıq ürək əməliyyatı etdiyi 7 xəstənin ölümünə səbəb olub. Uzun müddətdir saxta həkimin izinə düşən polislər nəhayət Yadavu tutublar.

O, saxta sənədlərlə əməliyyat keçirib, sonra yoxa çıxıb

Madhya Pradeş ştatının Damoh şəhərindəki missiya xəstəxanasında əməliyyat olunan Yadav, son uğursuz əməliyyatdan sonra fevralın ortalarında xəstəxanadan qaçdıqdan sonra yoxa çıxmışdı. Onun barəsində dələduzluq və sənəd saxtakarlığı maddələri ilə istintaq başladılıb. Polis hesab edir ki, Yadav təxminən iyirmi ildir saxta diplomlarla həkimlik edirmiş.

Damoh rayon prokuroru Şrut Kirti Somavanşi bildirib ki, şübhəli şəxs ifadələrində sənədlərinin əksəriyyətinin saxta olduğunu etiraf edib. Qalmaqal fevral ayında uşaqların müdafiəsi komitəsinin ölüm faktlarını səlahiyyətli orqanlara bildirməsi ilə üzə çıxdı. Prokurorluğa bir xəstənin yaxını da cinayət işi qaldırıb.

***

Saxtakar “həkim” özünü Corc Universitetinin professoru olan məşhur kardioloq Con Camm kimi təqdim etdi. Əsl Con Cammın hadisə ilə heç bir əlaqəsi olmadığı, ancaq illərdir saxta şəxsiyyətdən istifadə edən Yadavın fəaliyyətini dayandırmağa çalışdığı açıqlanıb.

Missiya xəstəxanası bildirib ki, Yadavın saxta sənədlərlə işləməsi barədə əvvəlcədən məlumatı olmayıb. "Heç kim onun saxta həkim olduğunu düşünmürdü. O, davranışı və biliyi ilə əsl professora oxşayırdı”, – xəstəxana işçisi deyib.

***

Xüsusilə kənd yerlərində savadlılığın aşağı olması Hindistanda saxta həkimlərin çoxalmasına səbəb olub. Səlahiyyətlilər son illər xəstəxanalarda reydlər keçirərək bu cür fırıldaqların qarşısını almağa çalışırlar.