Gecə saatlarında Fransanın müxtəlif şəhərlərində həbsxanalara qarşı silahlı hücumlar həyata keçirilib. Hadisələrlə bağlı araşdırmalara başlanılıb.

Fransanın ədliyyə naziri Cerald Darmanin “X” hesabında verdiyi açıqlamada, ölkədəki müxtəlif həbsxanalarda avtomobillərin yandırılmasından tutmuş avtomatik silahlarla atəş açılmasına qədər müxtəlif təhdid cəhdlərinin edildiyini bildirib.

Həbsxana işçilərinə dəstək olmaq üçün bu gün Tulona gedəcəyini deyən Darmanin, Fransanın narkotik ticarəti problemi ilə üzləşdiyini və cinayət təşkilatlarını son dərəcə narahat edəcək tədbirlər gördüyünü bildirib.

BFMTV kanalının Ədliyyə Nazirliyi mənbələrinə istinadən verdiyi xəbərə görə, gecə saatlarında hücuma məruz qalan müəssisələr arasında Tulon, Marsel, Luynes və Valens həbsxanaları var.

***

Luynes və Valens həbsxanalarının dayanacaqlarında avtomobillər yandırılarkən, Tulon həbsxanasının qapısına avtomat silahlardan atəş açılıb.

Cinayət dosyesi ilə tanış olan mənbə bildirib ki, bu hücumlar Fransada yüksək mühafizəli həbsxanaların yaradılmasına və Ədliyyə Nazirliyinin narkotik şəbəkələrinə qarşı strategiyasına cavab olaraq planlaşdırılıb və koordinasiyalı şəkildə həyata keçirilib.