Ehtimal var ki, Əmrah ailə üzvləri ilə birlikdə Suriyaya gedib. Vaxt.az xəbər verir ki, bu barədə Binəqədi Rayon Polis İdarəsi 40-cı polis bölməsindən vesti.az-a bildiriblər.

Məlumatda deyilir ki, ailə hələ may ayında yoxa çıxıb, lakin onların yaxınları polisə indi məlumat verib. Bildirilir ki, mayın 27-də 1990-cı il təvəllüdlü Əmrah Qüdrət oğlu Xankişiyev və onun həyat yoldaşı, 1991-ci il təvəllüdlü Xankişiyeva Ülviyyə Taleh qızı azyaşlı uşaqları - 2009-cu ildə anadan olmuş Səfiyə və 2012-ci ildə anadan olmuş Həmzə ilə birlikdə evdən çıxıblar və bir daha geri qayıtmayıblar.

Ailənin yoxa çıxması barədə polisə Əmrahın atası məlumat verib. Onun bildirdiyinə görə, oğlu və gəlini uşaqları ilə birlikdə onun evində yaşayıblar. Lakin oğlu ailəsi ilə birlikdə evi tərk edərək gizlənib, heç kimə heç nə deməyib.

Bir neçə gün sonra - iyunun 10-da Əmrah atası ilə telefon əlaqəsi saxlayıb və bildirib ki, guya Türkiyədədirlər və qazanc dalınca gediblər.

Lakin atası oğlunun dediklərinə inanmayıb və polisə ərizə yazıb. Ehtimal var ki, Əmrah ailə üzvləri ilə birlikdə Bəşər Əsədə qarşı döyüşən qruplaşmalara qoşulmaq üçün Suriyaya gedib.

Ancaq polis hələ bu ehtimalı təsdiqləmək imkanında deyil.